Paanch Minar movie review and rating !!!

టైటిల్‌: పాంచ్‌ మినార్‌

నటీనటులు: రాజ్ తరుణ్, రాశి సింగ్,అజయ్ ఘోష్, బ్రహ్మాజీ, శ్రీనివాస్ రెడ్డి, నితిన్ ప్రసన్న, రవి వర్మ, సుదర్శన్, కృష్ణ తేజ, నంద గోపాల్, ఎడ్విన్ లక్ష్మణ్ మీసాల, జీవా, అజీజ్ తదితరలు

నిర్మాణ సంస్థ: కనెక్ట్ మూవీస్ LLP

సమర్పణ: గోవింద రాజు

రచన & దర్శకత్వం: రామ్ కడుముల

నిర్మాతలు: మాధవి, MSM రెడ్డి

సంగీతం: శేఖర్ చంద్ర

డీవోపీ: ఆదిత్య జవ్వాది

విడుదల తేది: నవంబర్‌ 21, 2025

యంగ్ ట్యాలెంటెడ్ రాజ్ తరుణ్ హీరోగా రామ్ కడుముల దర్శకత్వంలో రూపొందిన క్రైమ్ కామెడీ ఎంటర్ టైనర్ ‘పాంచ్ మినార్’. రాశి సింగ్ హీరోయిన్ గా నటిస్తున్నారు. గోవింద రాజు ప్రజెంట్ చేస్తున్న ఈ చిత్రాన్ని కనెక్ట్ మూవీస్ LLP బ్యానర్ పై మాధవి, MSM రెడ్డి నిర్మిస్తున్నారు. ఇప్పటికే రిలీజైన సాంగ్స్, టీజర్, ట్రైలర్ కి  మంచి రెస్పాన్స్ వచ్చింది. నవంబర్ 21న ఈ చిత్రం విడుదల కానుంది. ఈ నేపథ్యంలో తాజాగా మీడియా కోసం ప్రివ్యూ వేశారు. మరి ఈ చిత్రం ఎలా ఉందో రివ్యూలో చూద్దాం

కథేంటంటే.. 

కృష్ణచైతన్య అలియాస్‌ కిట్టు(రాజ్‌ తరుణ్‌) ఉద్యోగం కోసం వెతుకుతుంటాడు. ప్రియురాలు ఖ్యాతి(రాశి సింగ్‌) ఒత్తిడి చేయడంతో సాఫ్ట్‌వేర్‌ జాబులో జాయిన్‌ అయ్యానని అబద్దం చెప్పి.. క్యాబ్‌ డ్రైవర్‌గా పని చేస్తుంటాడు. డబ్బులు ఎక్కువ వస్తాయనే ఆశతో ఉంటాడు కిట్టు. ఓ రోజు ఇద్దరు కిరాయి హంతకులు కిట్టు క్యాబ్‌ని బుక్‌ చేసుకొని.. అతని ముందే గ్యాంగ్‌స్టర్‌ చోటు(రవి వర్మ)ని హత్య చేస్తారు. ఈ హత్య చేసినందుకు మూర్తి(అజయ్‌ ఘోష్‌) వారికి రూ. 5 కోట్లు ఆఫర్‌ చేస్తాడు. ఆ డబ్బుని తీసుకునేందుకు వెళ్తున్న క్రమంలో హంతకులు పోలీసులకు చిక్కుతారు, అసలు కిట్టు హంతకులకు తెలియకుండా ఆ డబ్బుని కొట్టేస్తాడు. ఆ తర్వాత ఏం జరిగింది? ఈజీగా వచ్చిన డబ్బు.. కిట్టుకు ఎలాంటి సమస్యలు తెచ్చిపెట్టింది? తనను చంపేందుకు కుట్ర పన్నిన హంతకులు, సీఐ (నితిన్‌ ప్రసన్న)ల నుంచి కిట్టు ఎలా తప్పించుకున్నాడు? చివరకు రూ. 5 కోట్లు ఎవరికి దక్కాయి? ఈ కథకు ‘పాంచ్‌ మినార్‌’ అనే టైటిల్‌ ఎందుకు పెట్టారు అనేది తెలియాలంటే సినిమా చూడాల్సిందే. 

విశ్లేషణ

ఇదొక మంచి క్రైమ్‌ కామెడీ సినిమా.ఉద్యోగం సాధించాలనే క్రమంలో ఈజీగా డబ్బులు సంపాదించాలనుకునే ఓ కుర్రాడు ఎలాంటి సమస్యలో ఇరుక్కున్నాడు అనేది ఈ చిత్ర కథాంశం. జానర్‌కు తగ్గట్లు ప్రతి సందర్భంలో నుంచి థ్రిల్‌.. వినోదాన్ని పుట్టించే ప్రయత్నం చేశాడు దర్శకుడు రామ్ కడుముల. ఒకవైపు నవ్వులు పూయిస్తూనే..మరోవైపు తర్వాత ఏం జరుగుతుందనే క్యూరియాసిటీని పెంచేలా చేశాడు. హీరో పాత్ర ప్రాబ్లమ్స్‌లో నలిగిపోతున్న ప్రతిసారి ప్రేక్షకులు నవ్వుతారు. చోటు తండ్రి మరణించే సీన్‌తో కథ ప్రారంభం అవుతుంది. ఆ తర్వాత హీరో ఎంట్రీ..ఉద్యోగం కోసం ఆయన పడే పాట్లు.. అన్నీ నవ్వులు పూయిస్తాయి. చోటు హత్య తర్వాత అసలు కథ ప్రారంభం అవుతుంది. పాంచ్‌ మినార్‌ పదం కిట్టు జీవితాన్ని ఎలా మార్చేసిందనేది తెరపై చూడాల్సిందే. ఇంటర్వెల్‌ ట్విస్ట్‌ సెకండాఫ్‌పై ఆసక్తిని పెంచుతుంది. ఇక ద్వితియార్థంలో కథనం పరుగులు తీస్తుంది. తన ప్రాణాలతో పాటు డబ్బుని కూడా రక్షించుకునేందుకు హీరో చేసే ప్రయత్నాలు అలరిస్తాయి. చిన్న చిన్న టిస్టులు థ్రిలింగ్‌ కలిగిస్తాయి. ఇక క్లైమాక్స్‌లో వచ్చే ఓ ట్విస్ట్‌ అదిరిపోతుంది. 

దర్శకుడు రామ్ కడుముల కొత్తరకమైన స్క్రీన్ ప్లే తో ఈ సినిమాను రూపొందించారు, అలాగే ఫ్యామిలితో వచ్చి చూసే క్రైమ్ కామెడీ ఈ సినిమాలో ఉంది, ప్రొడక్షన్స్ వాల్యూస్ బావున్నాయి, ఎడిటింగ్, స్క్రీన్ ప్లే, బ్యాక్ గ్రౌండ్ స్కోర్ ఈ సినిమాకు మెయిన్ హైలైట్స్.

ఎలాంటి వల్గారిటీ, రక్తపాతం లేకుండా ఫ్యామిలీ అందరూ కలసి హాయిగా నవ్వుకుని చూసే క్రైమ్ కామెడీ ఎంటర్‌టైనర్‌ ఈ పాంచ్‌ మినార్‌. 

ఎవరెలా చేశారంటే...

కిట్టు పాత్రలో రాజ్‌ తరుణ్‌ ఒదిగిపోయాడు. ఇటీవల ఆయన నుంచి వచ్చిన చిత్రాలతో పోలిస్తే..ఇందులో రాజ్‌ తరుణ్‌ చాలా హుషారుగా కనిపించాడు. ఆయన పాత్ర సమస్యల్లో ఇరుకున్న ప్రతిసారి ప్రేక్షకుడు నవ్వుతాడు. ఖ్యాతి పాత్రకి రాశిసింగ్‌ న్యాయం చేసింది. ఇక నెగెటివ్‌ షేడ్స్‌ ఉన్న సీఐగా నితిన్‌ ప్రసన్న చక్కగా నటించాడు. కామెడీ విలన్‌గా అజయ్‌ ఘోష్‌ తనదైన శైలీలో నటించి మెప్పించాడు. సుదర్శన్‌, లక్ష్మణ్‌లు పంచ్‌ డైలాగ్స్‌లో నవ్వులు పూయించారు. మరోవైపు హీరో తండ్రిగా బ్రహ్మాజీ తెరపై కనిపించేది కాసేపే అయినా..బాగా నవ్వించాడు. మిగిలిన నటీనటులు తమ పాత్రల పరధిమేర నటించారు. 

సాంకేతికంగా సినిమా బాగుంది. శేఖర్ చంద్ర నేపథ్య సంగీతం సినిమాకు మరో ప్రధాన బలం. పాటలు ఆకట్టుకునేలా ఉంటాయి. సినిమాటోగ్రఫీ బాగుంది. ఎడిటింగ్‌ చాలా షార్ప్‌గా ఉంది. ఎక్కడా బోర్‌ కొట్టే సన్నివేశాలు లేకుండా క్రిస్పీగా కట్‌ చేశాడు. నిర్మాణ విలువలు సినిమా స్థాయికి తగ్గట్లు ఉన్నంగా ఉన్నాయి.

Rating: 3.5/5